نادية

نادية

فيديو القصيدة:

وباقول لها:

يا (نادية) و(ناديّة) و(نيديّة)

وضِحْكة ف قلبي منسيّة

وربي.. لولا متربّي

ما أقولك غير “يا غازيّة”

يا ناعْسة

نعاس الليل على شعرك بنى بيوتُه

وحط الطوب.. وأنا (أيّوب) ومش صابرْ

كلامِك وَقّف اللحن القديم وجدّدني

وشدّ ربابة الشاعرْ

لا أنا (بيرم) ولا (حدّاد) ولا (جابر)

كفاية الليل ملكتيني

مافيش فِ الشمس جنيّة.. يا غازيّة

كفاية الحبّ عاشقينُه

ولسعِةْ حبِّك المولود بتِسْحِرْني

أنا اللي نسيت بنات الدنيا فوق رمشِكْ

ما عايز غير أشوف وشِّكْ

بيضحكلي بألوانُه وتفانينُه

آدينا بقينا عاشقينُه

ومساكينُه ومساجينُه ومجانينُه

وحبّيتك بصوت الناي وصوت الطارْ

وضرْب النارْ.. وبراكينُه

لو الواد اللى قلبك مال له كان فارس

أنا (عنتر)!

ولو عايزاه يكون رقّاص

أكون من بكرة غازيّة

يا عشقي وسهَري وغُنايا

يا غَنّاية

يا ريتني أموت فِ جَبّانتِكْ

أو أبقى حتة فى لبانتِكْ

تبلّيني وترميني فأرجعلِكْ

ألزّق نفسي في نعلِكْ

وأحبّك ياكش تكرَهي لُقايا

أشيلِك صورة مطويّة

لبتّ غريبة غجريّة

عينيها سودا بدويّة

بتحكي حكاية العشّاق وتمضغها

يا غازيّة

نادية