منطقي

منطقي

فيديو القصيدة:

منطقي..

لمّا يبقى يتيم وأمّي، ويبقى سِيد العالمين

منطقي الحُسَّاد هتكتر والعِدا والكارهين

واللي هيقولّك ده شاعرْ

واللي هيقولّك ده ساحرْ

واللي هيقولّك ده كافرْ

واللي يكتب واللي يرسمْ

واللي يكدب واللي يشتمْ

منطقي!

هيّ غيرة

زي غيرة (الوليد بن المُغيرة)

مش كان هيسلم؟!

بس حاجة فى نفسه حَكِّتْ

كِبْره خلَّى نفسه شَكِّتْ

أصل داء الكِبر ده أكبر خطرْ

بس يعني الجَنَّة تِعْمَرْ وحدَها؟!

حَبَّة في الجنة ونعيمها.. وحَبَّة ف سقرْ

منطقي!

ومنطقي لمّا يبقوا المسلمين حالهم كده

تطلع ضوافر للعِدا

ما دُمت مش زارع بإيدك غَلّتَكْ

والجوع قَرَص على معدتَكْ..

فذَلِّتَكْ

ما دمت متشتّت وتايِه فى الكلام

فين الودان اللي هتسمع شكوتَكْ؟!

ومنين يجيلَك وِشّ تِحْمَقْ ولَّا تغضَبْ

ولَّا ترفع كلمتَكْ؟!

همَّ مش قاصدين يهينوا المصطفى بحبة صورْ

همَّ عارفين إن سَيِّدنا النبي سيد البشرْ

همَّ قاصدينَكْ و قاصدينِّى و قاصدين كل جيلنا

وطول ما بِنْكَسِّلْ ونتفرَّق وبنداري الحقايق

لسه ياما راح يجيلنا

أمّا سيّدنا النبي ربُّه كافيه

يستهزأوا مِنِّينا إحنا

أمّا هو رَبُّه صاينه ومصطفيه

لو كانوا حضْروه كانوا عرفوا يرسموه

كانوا هيسمّوه بعدله وبسماحته وبهدوؤه

كانوا شافوا إن الصحابة بتلحق الميّة اللى نازلة من وضوؤه

لو كانوا لحقوه كانوا عرفوا يرسموه

إحنا مارسمناش نبينا في العيون

إحنا فهّمناهم إن الدين بتاعنا لا فيه علوم ولا فيه عمل

ولا فيه أدب ولا فيه فنون

اتلهينا بإحنا كنّا وإحنا كنّا

ونمنا في اللي راح يكون

بس إحنا فُقنا

بجد آسفين لَك وراجعين لَك

شعبك نشيط عامل وصافي وتقي

زيّك يا سيدنا النبي يا أبو قلب طاهر نقي

أمّا اللي واكلاهم غيرتهم..

فَدَه.. منطقي

منطقي