قصيدة سكرانة

قصيدة سكرانة

فيديوهات القصيدة:

من كام شهرْ

خدْتْ قرار مش هاكتب شعرْ

وإنّي هاذاكِر وأنجح وأفلحْ

وآخد البكالوريوس وأتجوّزْ

وأشتري عفشتي بالتقسيطْ

من كام شهرْ.. أنا كنت عبيطْ

من كام شهرْ

زرعْتْ الميّة وطرَحِتْ فجْلَة

جاب العجل الفجلَة لِعجْلَة

وقال لها: مهرِك!

ريحِة قهرِكْ

فايحَة في نهرِكْ

قالت: إوعى تعيش كسلانْ

(بابا نويل) بيوزّع (يويو) في حرب (إيرانْ)

شامِمْ ريحِة جبنَة قديمَة

فيلم السهرة ماكانش سياسي

كان عبّاسي

(عبد النّاصر) حب يقلّد فينا الروسْ

ساوَى الروسْ

“لَبْرِلْ” نفسَكْ

لاجل ما تبقى مثقّف زي صاحبنا إيّاه

عندَك (ماركس) عندَك (هيجل)

عندَك (حسن البنّا) و(حجّي)

عندَك زحمَة

صفّي ونقّي

مُنحَنَى عَرْض النِسْكافِيه.. واخِد إفّيه

حاصِل ضرْب النّكسة في حرب أكتوبر في معاهدة ديفيد

بيساوي حاصل ضرب النارْ في التارْ في العارْ

مرفوعة لأُسّ اتنين مخاويتْ

وزي (امرئ القيس) وجلامدُه اللي نازلة من علِ

عندينا واد اسمه (علي)

بيطلّع الدبّابة ويلفّ بيها في البلدْ

ومراته دايرة بشعرها تدوّر عليه

وماتسألوش أنا قصدي إيه

أنا نفسي مش فاهم كلامي!

بس الكلام واعر حويطْ

أنا اللي دون الناس.. عبيط ْ

من كام شهر.. كنت باحبِّك

كنت باوضّب روحي وأحَبِّك لاجْل ما أقابلِكْ

كنت في كل حالاتِك.. قابلِك

تفرحي.. قابلِك

تزعلي.. قابلِك

تتقلي.. قابلِك

كنتي الأرض، وكنْتْ سنابلِك

كنتي الحرب، وكنت قنابلِك

حتي في بُعدك وإنتي مسافرة

وبيني وبينك ألف محطة كنت باقابلِك

عمري يا (نانا) ما قلبي اتنازل

ولا ساب حقُّ زي ما سابلِك

عمرُه ما ضحّى بسهدُه وسهَرُه

وجاب من عمره زي ما جابلِك

هذا الوَجَعُ.. بَقَاياكِ

سِحْرٌ تمدَّدَ بَيْنَ ضِلْعَيَّ

وتَوَارَى خَلْفَ سلَّمِ مَنْزِلِكِ

تَرَكَ لَكِ رِسَالَةَ كُلِّ صَبَاحٍ وسَافَرْ

يشهد عليكي السلم المستني خطوتْنَا

تشهد عليكي الشبابيك اللي فتّحتيها علشاني في نص الليل وعزّ البردْ

يشهد عليكي محل الهدايا اللي ع الناصية وكشك الوردْ

تشهد عليكي هدومك اللي قولتلِّك ماتلبسيهاش

تشهد عليكي امتحاناتي اللي علشانك مادخلتهاش

تشهد عليكي (ويتني هيوستن)، (جورج مايكل)

عمّ (شوقي) بتاع الفطيرْ

كِيف يصير الحال كده؟

م الابتدا.. أنا اللي غلطانلِك

وأنا اللي محقوقلِك

وأنا اللي دُون الناس عشقتِك

كنت عايش جوّه صدرِك حلم دافي

كنت بانسى الناس وأجيلِك يوم معادِك.. ياكش حافي

كنت أبسَط من بسيطْ

واكتشفت إني ف هواكي

كنت دون الناس.. عبيطْ

قصيدة سكرانة