عن هويس الشعر العربي هشام الجخ

About-Hishamاللحظة دي صعبة جدا لما يطلبوا منك بإصرار إنك تكتب تعريف للناس عنك وعن حياتك.. خلينا نحاول…
أنا هشام الجخ. أصلا من قنا.. مركز أبو تشت.. ومسقط رأسي سوهاج وخوالي كمان من سوهاج درست واتربيت في سوهاج لغاية ما دخلت كلية التجارة هناك.. كانت أياميها تبع جامعة أسيوط حولت من تجارة سوهاج لتجارة عين شمس واتخرجت في جامعة عين شمس سنة 2003. اتعينت مشرف على المركز الثقافي في جامعة عين شمس في نفس سنة التخرج وعملت دراسات عليا في إدارة الأعمال في نفس الجامعة. زمايلي وأنا أسسنا المركز الثقافي في الجامعة وكانت فترة نهاية التسعينات وبداية الألفية الجديدة – بفضل الله – عصر مشهود له في تاريخ جامعة عين شمس أدبيا. استقلت من الوظيفة بالجامعة سنة 2009 لأني باختصار ماعرفتش أعيش حياة الموظفين التقليدية.. ده غير إن البيروقراطية وقتها كانت شيء قاتل لكل الأنشطة الطلابية ولكل مناحي الإبداع.. بخلاف الدولة الأمنية المقيدة لكل شيء آنذاك. اهتميت بمشروعي اللي بقالي 15 سنة باحلم بيه وهو زيادة شعبية الشعر في مصر وإعادة الشعر على ألسنة الشباب والأطفال.
في السكة بقى حصلت حاجات كتير طبعا.. حصلت على “أحسن شاعر عامية” من اتحاد الكتاب سنة 2008.. حصلت على شوية مراكز في الشعر الفصيح والعامي أيام الجامعة يعني.. مش ده المهم.. المهم إني باحب الشعر جدا.. وباذاكره.. وباكتبه على مهلي جدا جدا جدا.. ومش بقول شعري لحد غير لما أكون أنا قريته 40 مرة وعجبني تماما..
باحب أسمع مزيكا هادية جدا.. لكن ساعات بتلاقيني قلبت وشغلت مزيكا صاخبة وقمت أرقص. باستمتع قوي قوي قوي بالرقص الصعيدي والنوبي والسمسمية.
أهلاوي وباحترم جمهور الزمالك.. وكنت بالعب باك يمين في فريق سوهاج أيام 4-2-4 لما كان فيه حاجة اسمها باك وحاجة اسمها وينج.
اتجوزت سنة 2004 وربنا أفاض عليا بزوجة صالحة وبنتين زي القمر وولد رزل وشقي جدا.
مواليد أول أكتوبر.. يعني برج الميزان. رغم إني كنت ابن والدتي الوحيد – رحمها الله – لكن ما أظنش إني عشت كولد مدلل.. يمكن لأن والدتي – رحمها الله – كانت سيدة تربوية بحكم عملها كرئيس قطاع تعليمي بسوهاج، ويمكن لأن أبويا لم يكن يفرق في المعاملة بين أبنائه ونسائه فخرجنا جميعا متساويين في المعاملة والتربية.
لما جيت القاهرة جديد كنت لسة في الجامعة.. اشتغلت في مجال التصميمات والجرافيك والطباعة.. تركت المجال لكني مازلت – حتى وقتنا هذا – لما باعدي على جسر السويس لازم أدخل عين شمس وأسلم على أصحاب المطابع والصنايعية أصدقائي.
باحترم الناس جدا وأي حد بيعمل معايا موقف وحش باحط نفسي مكانه وأفكر بأسلوبه وأحاول أتعامل مع الموقف من وجهة نظره..
أمتع لحظاتي لما أقف على المسرح وأشوف عيون الناس بتلمع وهي بتسمع شعر..
وأتعس لحظاتي لما حد مايعرفنيش يتهمني بالغرور.. غرور على خيبة إيه مش عارف؟؟ تقولش الواد حليوة قوي؟؟؟
باكره نظام حسني مبارك جدا جدا جدا وشفت بعيني الناس اللي اتحرقت في قطر الصعيد وهي حية.. وعانيت كتير أيام (مبارك) وتكررت المعاناة أيام (مرسي).. ولو النظام اللي بعده كان زيه أو حتى شبهه يبقى مكتوب على هشام الجخ تفضل قصايده ممنوعة – أقصد القصايد المهمة طبعا.
باحلم بالمساواة مسلم ومسيحي وصعيدي وبحراوي وغني وفقير.. نفسي الشباب اللي في سني يلقوا شقق يتجوزوا فيها ويلقوا وقت يقروا ويتثقفوا ويفكروا.. ونفسي جدااااااااااااااااا أصلي في المسجد الاقصى تحت حكم عربي.
تحياتي لحضراتكم جميعا.

الحساب الشخصي الوحيد على الفيس
الصفحة الرسمية الوحيدة على الفيس
الحساب الوحيد على تويتر
الحساب الوحيد على الإنستجرام
صفحة رابطة محبي هشام الجخ على الفيس


القصائد - آخر الأخبار - معرض الصور - الرابطة - عن هشام - اتصل بنا
 

 
 
previous next
X